الثلاثاء، 25 سبتمبر، 2012

الله يعظم أجري


مايردن من سؤالي عليك إلا
حياي ..
وقيمتك عندي وقدرك
وإحترامي ..
بس أبقول كلمه وارجع أسوق
خطاي ..
وأبكي على فرقاك بعد
إنهزامي ..
أدري ماجيتك على هقوتك
يامناي ..
خيبت ظنك بالهوى وأقفيت
ضامي ..
لكن ترا والله إن السبب
دنياي ..
تحقق أحلام غيري وتمنع
أحلامي ..
نصيبي من الدنيا مارحم
رجواي ..
خلا الدموع تعانق أوجاعي
وآلآمي ..
الله يعظم أجري ويجبر
عزاي ..
ويرحم اللي بقى من عمري
وأيامي ..
بودعك وآخذ معي حبك يناجي
خفاي ..
يسلي خافقي لاغشى صدري
ظلامي ..





الأربعاء، 15 أغسطس، 2012

وتمضي الايااام ...







_ وتمضي الأيام ..

كنا صغار ماهمنا وش صار ؟ ولا وش يصير
همنا نعيش بالدنيا نطيش نضحك ونلعب
والبسمه مننا تتعب .. مانفكر .. حياتنا سهله
( أتحداك تسوي كذا ) هذي بس الأصعب ..
عمرنا بس بالنهار و بعد الغروب
يذبحنا الأنتظار .. ننتظر لقمه نتعشى ..
نشتاق للنوم ماهو مهم وين ؟ وبأي مكان ؟
مانحب الليل كانوا يخوفونا بالعووي أبو ذيل
ياكل الوغدان .. ومن الحرامي .. لايجيكم
أنت نام وأنتي نامي .. ونصحى نكمل طيش ..
غفينا البارح ماغسلنا وجهينا من العيش ..
لاعلى البال ولا على الخاطر .. أحلا كلمه
نسمعها عفيه عليك .. أنت الشاطر ..

_ وتمضي الأيام ..

كبرنا شوي .. بس تونا بعمر الطفوله عرفنا
الكلام واللي به عيب نستحي مانقوله ..
وهمنا هو همنا نلعب ونتجمع .. هذا يضحك
وهذا يضرب وهذا واقف يتسمع .. وهذا يحاول
يكتب أسمه وهذا على التراب يتفنن برسمه ..
 عيال وبنات ماتنطبق علينا التقاليد والعادات
وإذا مر واحد كبير يقول : أجلسوا ياوغدان
وحنا اصلا" جالسين بس هو كذا ( يعني اني )
كبير وأعرف وش يصير !!  وحنا نخاف ونصدق
كلامه ونطيع ( نشوف فيه الذيب وحنا القطيع ) ..
ونتمنى متى نصير كبار ونسوي مثله بالصغار ..

_ وتمضي الأيام ...

ونكبر شوي وشوي .. بس فينا روح الصغار
يعني صرنا نفكر ونتسابق على الدكان قبل
يسكر .. صار معنا مصروف ونرتب الكلمه
مانخطي بالحروف ، والارقام .. نعرف إن هذي
عشره وهذا ريال وصاروا ينادونا :
يابنات وياعيال .. كبرونا عن قولة ياوغدان ..
تذكرون هذاك الزمان ؟

_ وتمضي الأيام ..

كبرنا شوي وشوي وشوي .. وصرنا شباب ..
ونحسب ألف حساب للزله والخطا والكلام
اللي عليه عتاب .. وإذا شافك أحد
يقول بإستغراب : ماشاءالله كبرت
وطلع لك شنب وتغيرت .. تلبس عقال
والله وصرت رجال وأنت تلاحظ
حتى بجسمك تحررت كل ماتأملت ..
وهناك نفس الحكايه صارت تلبس
عبايه .. وشيله تغطي شعرها .. ماشاءالله
يابنتي .. والله كبرتي  وصرتي عروسه ..
شالت هم البيت والمطبخ والحوسه ..
وصار ( العيب )حارس علينا عادات وتقاليد
هي اللي تمشينا .. تغطي يابنت ..
وهيه أنت .. وش عندك واقف عند الباب ..
استحوا واخجلو كبرتوا مانتم وغدان ..
كنا نشتاق ونحب بس نخجل نقول ..
صار عندنا احساس ورغبه وميول ..
نعبر بالنظر و بالأسلوب .. ويبان بالعين
المكتوب .. ونبني أحلام ونسهر ماننام
و تصف الشفايف عذب الكلام ..

_ وتمضي الايام ...

كبرنا وصرنا كبار .. وقلوبنا حبت
على الشرف تربت .. يلعبها النسناس
من وين ماهبت .. قلوب خضراء نقيه
من الهوى صارت شقيه يردنا عن حبايبنا
عادات وتقاليد .. وش الجديد ؟
زادت ضغوطات الحياة مسؤليات وروحات
وجيات .. ونطمح للوظيفه مدير او كاتب
المهم يمشي لك راتب .. الحياه صارت
دراهم وجمع اموال ..
معك فلوس تعيش احسن عيشه ..
مامعك فلوس يحذفونك من الدريشه ..
الدنيا صارت صعبه .. من عقب
ماكانت لعبه ..
خلاص صرنا كبار .. تغير علينا الزمان ...
وين اللي كان .. يجمعنا مكان .. قلبين
يغذيهم حب وحنان .. إفترقنا .. وصار
الزمن يحرقنا .. كبرنا وغصب" علينا
تغيرنا .. ظروف الحياه صارت ضدنا
والهموم اللي تهدنا .. أيام ترخينا وأيام
تشدنا .. ونتذكر يوم نتمنى نصير زي
هذاك اللي ( يعني اني ) كبير يقول :
اجلسوا ياوغدان ... ياليتنا ماكبرنا ..
ياليتنا صغار .. مانبي نصير كبار ..
تكفى يازمان .. رجعنا صغار ..
مانبي نصير كبار ..


ياليت ... ماتمضي الأياااام ...


الخميس، 31 مايو، 2012

تو الهوى طاب





بعد فتره غياب  و لأنشغالي
حضرت هنا ومعي شوق لكم واحساس متواضع اطمح ان تشاركون به نقد واعجاب


..........................




تكلمي .. سولفي .. لو سالفتك عتاب
أبسمع أنا صوتك يابعد كل الأصوات
مشتــاق لحرفك اللي خذاه الغيــاب
مشتاق تجمعني كلمتك بعد الشتات

عقبك ترا الوقت شكل علي أحزاب
حزب وده يبعد البسمه عني مسافات
وحزب يحاول يصيب النفس بإكتئاب
وحزب ناوي يوردني لدروب الممات

ياصاحبي .. لو كان لغيابك عذر وأسباب
معذور يـــاورد زهى بروض النبات
وان كان قصدك تفقد بعقلي الصواب
ترا شبعت  آهـات وآهـات وآهـات

ماللجفا داعي .. والبعد بين الأحباب
دام الغلا والحب  بعروقنــــا يبات
ليت القدر يفتح من أحلامنــــا باب
ويجمع أثنين إمتلت أدراجهم أمنيات

تكلمي .. سولفي .. تو الهوى طاب
وتو المسامع صحت عقب السبات

،،،،،






الأربعاء، 22 فبراير، 2012

فوضويه ...




.
.
.

جيتها .. فوضويه .. متبعثره ..
مدري تلملمني ولا عسى أقدر الملمه ..
قربت له .. لقيت العالم من طبعه
أصبح عولمه ..
في صمتها  ،، طفله جاهله ..
وأن حكت صفت حروف المعرفه
ما أحد يقدر يكلمه !!
تحب الفلسفه .. وحكمه زمانه :
من يريد المجد يعتلي سلمه .. سلمه


هي كذا من يوم جيت للدنيا
بـ سكونه شقاوه .. ومن شقاوتها حدث
ومن أحداث الحياه ، متعلمه ..
بالحب ترسم معاني غرور وتواضع
تكتبه من قصص جداً " مؤلمه "
أحيان طبعها قاسي ومن زود عطفه
 لو هزها موقف أشوف دمعتها بعينه متولمه


تخيلت دنياي من دونه وش تكون ؟
وأكتشفت إني بدونه أعيش بدنيا مظلمه ..
أحبه .. لو هي فوضويه .. ومتبعثره
أحبه .. لو ماتلملمني أو ماقدرت الملمه 
أحبه .. يارب تحفظها لقلبي وتسلمه
أحبه .. يارب تحفظها لقلبي وتسلمه