المشاركات الشائعة

الأربعاء، 15 أغسطس، 2012

وتمضي الايااام ...







_ وتمضي الأيام ..

كنا صغار ماهمنا وش صار ؟ ولا وش يصير
همنا نعيش بالدنيا نطيش نضحك ونلعب
والبسمه مننا تتعب .. مانفكر .. حياتنا سهله
( أتحداك تسوي كذا ) هذي بس الأصعب ..
عمرنا بس بالنهار و بعد الغروب
يذبحنا الأنتظار .. ننتظر لقمه نتعشى ..
نشتاق للنوم ماهو مهم وين ؟ وبأي مكان ؟
مانحب الليل كانوا يخوفونا بالعووي أبو ذيل
ياكل الوغدان .. ومن الحرامي .. لايجيكم
أنت نام وأنتي نامي .. ونصحى نكمل طيش ..
غفينا البارح ماغسلنا وجهينا من العيش ..
لاعلى البال ولا على الخاطر .. أحلا كلمه
نسمعها عفيه عليك .. أنت الشاطر ..

_ وتمضي الأيام ..

كبرنا شوي .. بس تونا بعمر الطفوله عرفنا
الكلام واللي به عيب نستحي مانقوله ..
وهمنا هو همنا نلعب ونتجمع .. هذا يضحك
وهذا يضرب وهذا واقف يتسمع .. وهذا يحاول
يكتب أسمه وهذا على التراب يتفنن برسمه ..
 عيال وبنات ماتنطبق علينا التقاليد والعادات
وإذا مر واحد كبير يقول : أجلسوا ياوغدان
وحنا اصلا" جالسين بس هو كذا ( يعني اني )
كبير وأعرف وش يصير !!  وحنا نخاف ونصدق
كلامه ونطيع ( نشوف فيه الذيب وحنا القطيع ) ..
ونتمنى متى نصير كبار ونسوي مثله بالصغار ..

_ وتمضي الأيام ...

ونكبر شوي وشوي .. بس فينا روح الصغار
يعني صرنا نفكر ونتسابق على الدكان قبل
يسكر .. صار معنا مصروف ونرتب الكلمه
مانخطي بالحروف ، والارقام .. نعرف إن هذي
عشره وهذا ريال وصاروا ينادونا :
يابنات وياعيال .. كبرونا عن قولة ياوغدان ..
تذكرون هذاك الزمان ؟

_ وتمضي الأيام ..

كبرنا شوي وشوي وشوي .. وصرنا شباب ..
ونحسب ألف حساب للزله والخطا والكلام
اللي عليه عتاب .. وإذا شافك أحد
يقول بإستغراب : ماشاءالله كبرت
وطلع لك شنب وتغيرت .. تلبس عقال
والله وصرت رجال وأنت تلاحظ
حتى بجسمك تحررت كل ماتأملت ..
وهناك نفس الحكايه صارت تلبس
عبايه .. وشيله تغطي شعرها .. ماشاءالله
يابنتي .. والله كبرتي  وصرتي عروسه ..
شالت هم البيت والمطبخ والحوسه ..
وصار ( العيب )حارس علينا عادات وتقاليد
هي اللي تمشينا .. تغطي يابنت ..
وهيه أنت .. وش عندك واقف عند الباب ..
استحوا واخجلو كبرتوا مانتم وغدان ..
كنا نشتاق ونحب بس نخجل نقول ..
صار عندنا احساس ورغبه وميول ..
نعبر بالنظر و بالأسلوب .. ويبان بالعين
المكتوب .. ونبني أحلام ونسهر ماننام
و تصف الشفايف عذب الكلام ..

_ وتمضي الايام ...

كبرنا وصرنا كبار .. وقلوبنا حبت
على الشرف تربت .. يلعبها النسناس
من وين ماهبت .. قلوب خضراء نقيه
من الهوى صارت شقيه يردنا عن حبايبنا
عادات وتقاليد .. وش الجديد ؟
زادت ضغوطات الحياة مسؤليات وروحات
وجيات .. ونطمح للوظيفه مدير او كاتب
المهم يمشي لك راتب .. الحياه صارت
دراهم وجمع اموال ..
معك فلوس تعيش احسن عيشه ..
مامعك فلوس يحذفونك من الدريشه ..
الدنيا صارت صعبه .. من عقب
ماكانت لعبه ..
خلاص صرنا كبار .. تغير علينا الزمان ...
وين اللي كان .. يجمعنا مكان .. قلبين
يغذيهم حب وحنان .. إفترقنا .. وصار
الزمن يحرقنا .. كبرنا وغصب" علينا
تغيرنا .. ظروف الحياه صارت ضدنا
والهموم اللي تهدنا .. أيام ترخينا وأيام
تشدنا .. ونتذكر يوم نتمنى نصير زي
هذاك اللي ( يعني اني ) كبير يقول :
اجلسوا ياوغدان ... ياليتنا ماكبرنا ..
ياليتنا صغار .. مانبي نصير كبار ..
تكفى يازمان .. رجعنا صغار ..
مانبي نصير كبار ..


ياليت ... ماتمضي الأياااام ...


هناك 7 تعليقات:

ريبال بيهس يقول...

مساء الورد صديق الحياة

كل عام وانت بخير

وعساك من عواده يارب

وأعتذر عن تأخري عن هنا كما أتمنى

بألا تطيل الغياب فجمال حرفك يستشفعك

لتكون متواجد على الدوام في مدونتك

الراقية ...

ركزت على مراحل الحياة ولم يفتك أن

تذكر بعض ما يميزها والتغيرات التي

تلحق بها ولكن وصلت لنقطة الصفر

عندما ثبت لك أنها كلها لا توازي

شيء مقارنة بنقاء وعفوية وجمال

مرحلة الطفولة ...

مبدع ومميز

تحياتي وإحترامي

ريـــمـــاس يقول...

صباح الغاردينيا
كل عام وأنت بخير
ماأروع وصفك وتدرج تلك الفترة من العمر جسدتها ببراعة "
؛؛
؛
لروحك عبق الغاردينيا
كانت هنا
reemaas

صديق الحياه يقول...

ريبال الغالي .. كل عام وانت بالف خير
وشكرا
ريبال الغالي .. كل عام وانت بالف خير وكل عام وحضورك أجمل واجمل ..









صديق الحياه يقول...

ريماس .. تواجدك الأروع والأجمل
دمتي ودامت طلتك ..

خُلودْ ( ) " يقول...

وُمضت الأيآمَ !
وُجعلتُ مدونتي السابقة ماضيّ ~

أذُكر بأنك طلبت رؤية حرفيْ
سـ تجدُ نثريّ هُنآ ’

http://louda-1414.blogspot.com/

()_()

الشعرآء يتبعهم الغآوون , وانهم دآئما يقولون مالا يفعلون ..! يقول...

............؟!!

صديق الحياه يقول...

خُلودْ ( ) "

يشرفني متابعتك ...
وسوف يكون لي بمدونتك حضور قريبا